آمادگی تاجیکستان برای میزبانی از مذاکرات طالبان و جبهه پنجشیر

رییس جمهور تاجیکستان در دیدار با نخست وزیر پاکستان از توافق طرفین برای کمک به حل اختلاف طالبان و جبهه پنجشیر خبر داد.

- به نقل از رادیو پاکستان، دولت های اسلام آباد و دوشنبه از عزم خود برای متقاعد کردن جبهه پنجشیر و طالبان به حل اختلافات از راه مسالمت آمیز خبر دادند.

امامعلی رحمان رییس جمهور تاجیکستان و عمران خان نخست وزیر پاکستان طی یک نشست مطبوعاتی اعلام کردند که از تلاش برای میانجیگری در روند مذاکرات میان طالبان و جبهه پنجشیر استقبال می کنند و حتی شهر دوشنبه- پایتخت تاجیکستان –آمادگی میزبانی از این نشست را دارد.

نخست وزیر پاکستان در این باره گفت: ما توافق کردیم که تاجیکستان با رهبران پنجشیر و پاکستان با طالبان صحبت کند تا هر چه سریع تر پای میز مذاکره در دوشنبه بنشینند.

رییس جمهور تاجیکستان نیز تاکید کرد که او و نخست وزیر پاکستان به میانجیگری در مذاکرات کمک خواهند کرد.

امام علی رحمان همچنان تاکید کرد که او از دولت فراگیر در افغانستان با مشارکت همه گروه های اجتماعی حمایت می کند.

وی در این باره افزود: به این ترتیب، تاجیک ها و سایر اقوام جایگاه شایسته خود را در دولت فراگیر خواهند داشت.

ما متقاعد شده ایم که این تنها گزینه برای تامین صلح و ثبات در افغانستان است.